རིན་ཆེན་གླིང་། Ι Rinchenling, Khotakha

ངོ་སྤྲོད།

རིན་ཆེན་གླིང་།

མཁོ་ཐང་ཁ་རིན་ཆེན་གླིང་ཟེར་བའི་ གཡུས་ཚན་དེ་ ཕྱི་མཐའ་འཁོར་ཚུ་ག་ར་གངས་རི་གིས་བསྐོར། ནང་ལྷ་ཤིང་ཤུགས་པ་གིས་གང་། བར་ན་ བྱ་དང་བྱི་ཅུང་གི་སྐད་དང་། བདུད༌རྩིའི༌ཆུ༌རྒྱུན་མ་ཆད་པར་ རིམ་གྱིས༌འབབས་ཏེ་ རི༌དྭགས༌སེམས་ཅན་ཚུ་ཡང་ གཅིག་གིས་གཅིག་ལུ་བྱམས་པ་དང་བརྩེ་བའི་སྒོ་ལས་ བག་འཕེབས་ཏོག་ཏོ་སྦེ་འཁྱམས། འདི་ཁར་ གཞི་ཆགས་ཏེ་སྡོད་མི་ འགྲོ་བ་མི་ཚུ་ཡང་ སེམས་དམ་པའི་ཆོས་ཀྱིས་བཏུལ་ཏེ་ ལུས་དགེ་བ་བཅུ་དང་མཐུན་པའི་ལཱ་ལུ་བརྩོན་ཏེ་ ཕྱིའི་བྱ་སྤྱོད་དང་། ནང་སེམས་ཁམས་གཉིས་ཆ་ར་ ལྷ་དང་ལྷ་མོ་དངོས་སུ་ཨིན་པའི་ འཚོར་ཉམས་བྱིན་ཚུགས་མི་ མི་ངོམ་ཙང་ཙ་འཛོམས་ཏེ་འདུག།

གཡུས་ཚན་དེ་ འཕགས་མཆོག་ཕྱག་ན་པདྨོའི་གདུལ་ཞིང་། ཨོ་རྒྱན་གུ་རུ་རིན་པོ་ཆེའི་སྦས་གནས། དཀར་བརྒྱུད་ཀྱི་བླམ་ཚུ་གིས་ བསྟན་པ་དང་སེམས་ཅན་གྱི་འགྲོ་དོན་རྒྱ་སྦོམ་སྦེ་མཛད་ས། དེ་ལས་ དབེན་པའི་ཡོན་ཏན་ཚུ་ག་ར་ཚང་སྟེ་ཡོད་པའི་ས་གནས་ཅིག་ཨིན་པ་གི་མ་ཚད། སྔོན་མཁས་གྲུབ་ཀྱི་བླ་མ་ལེ་ཤ་ཅིག་བྱོན་ཏེ་ དྲན་པ་ཙམ་གྱིས་ངན་སོང་གསུམ་ལས་འགྲོལ་ཚུགས་པའི་ ལུང་དང་རྟོགས་པའི་ཆོས་དང་། རེག་པ་ཙམ་གྱིས་བྱང་ཆུབ་ཀྱི་གོ་འཕང་འཐོབ་ཚུགས་པའི་ བྱིན་ཅན་གྱི་ལྷ་ཁང་དགོན་སྡེ་ལེ་ཤ་ཅིག་ ཕྱག་བཏབ་མཛད་གནང་ནུག།

གཡུས་ཚན་དེ་ དཔལ་ལྡན་འབྲུག་པའི་རྒྱལ་ཁབ་ཀྱི་གདན་ས་ཆེན་པོ་ དབང་འདུས་ཕོ་བྲང་རྫོང་ཁག་འོག་ལུ་ ཆགས་ཏེ་འདུག། རྫོང་ཁག་གི་ཡོངས་འབྲེལ་འཆར་སྒོ་ནང་བཀོད་མི་ གནས་ཚུལ་ཚུ་དང་འཁྲིལ་བ་ཅིན་ རྫོང་ཁག་འོག་ལུ་ རྒེད་འོག་བཅོ་ལྔ་ཡོདཔ་སྦེ་བཀོད་དེ་འདུག། གཡུས་ཚན་དེ་ རྒེད་འོག་དེ་ཚུ་གི་གྲལ་ལས་ སྦྱེས་ནག་རྒེད་འོག་གི་མངའ་ཁོངས་ནང་ཚུདཔ་ཨིན་པས། གོང་ལུ་བཀོད་ཡོད་དོ་བཟུམ་ གཡུས་ཚན་འདི་ནང་ སྔོན་འབྱོན་རྒྱལ་བ་གོངམ་ཚུ་གིས་ བྱིན་གྱིས་བརླབས་པའི་སྦས་གནས་ལེ་ཤ་འདུག།

གཡུས་ཚན་གྱི་འགྲོ་ལམ།

གཡུས་ཚན་དེ་ནང་འགྱོ་ནིའི་དོན་ལུ་ ཤར་ཕྱོགས་ཁ་ཐུག་འགྱོ་སའི་གཞུང་ལམ་ ཡོངས་གྲགས་ལུ་ ཊི་ཀི་ཟམ་པ་ཟེར་སླབ་སའི་ ས་གནས་ཁར་ལྷོདཔ་ད་ སྣུམ་འཁོར་ལམ་གྱི་སྒོར་བཏབ་ཅིག་གུ་ལས་གཡས་ཁ་ཐུག་ འགྱོ་དགོཔ་ཨིན་པས། ཤར་མཁོ་ཐང་ཁའི་གནས་བཤད་བསྡུས་པ་དད་པའི་མིག་བྱེད། (གནམ་ལོ་མེད། ཤོག་གྲངས་ ༦ པའི་ནང་ལུ་) “རབ་མཛེས་གཡུ་ཡི་གདངས་འཛིན་ལྷུན་པོས་བསྐོར། །ལྡེམ་ལྡེམ་སྨན་ཤིང་ལྗོན་པ་རྒྱས་པའི་དབུས། །མཚར་སྡུག་འདོད་ཡོན་དཔལ་གྱི་དགའ་སྟོན་འཁྱིལ། །རྨད་བྱུང་མཁོ་ཐང་སྐྱིད་པའི་ཡུལ་ལྗོངས༌གཟིགས།།” ཟེར་གཡུས་ཚན་དེ་ ག་ནི་བ་མཛེས་ཏོག་ཏོ་དང་སྐྱིད་ཏོང་ཏོ་ཡོད་པའི་སྐོར་ལས་ བསྟོད་རྩོམ་ཅིག་བྲིས་ཏེ་འདུག།

རིན་ཆེན་གླིང་།

རིན་ཆེན་གླིང་མཐོ་རིམ་བཤད་གྲྭ།

ཤར་མཁོ་ཐང་ཁའི་གནས་བཤད་བསྡུས་པ་དད་པའི་མིག་བྱེད། (གནམ་ལོ་མེད། ཤོག་གྲངས་ ༡༦ པའི་ནང་ལུ་)བཀོད་ཡོད་མི་དང་འཁྲིལ་བ་ཅིན་ ད་ལྟོ་ཡོངས་གྲགས་ལུ་ རིན་ཆེན་གླིང་མཐོ་རིམ་བཤད་གྲྭ་ཟེར་མི་དེ་ མི་ལོ་ ༥༠༠ གི་ཧེ་མར་ཀུན་མཁྱེན་གློང་ཆེན་རབ་འབྱམས་ཀྱིས་ གདན་ས་བཏབ་གནང་པའི་ལོ་རྒྱུས་བཀོད་དེ་འདུག། ཧེ་མའི་ཀུན་མཁྱེན་གློང་ཆེན་རབ་འབྱམས་ཀྱིས་ གདན་ས་བཏབ་གནང་མི་འདི་རྩ་མེད་སོང་ཡོདཔ་ལས་ གདན་ས་རྙིངམ་འདི་གུར་མར་པ་ལོ་ཙཱ་བའི་རྣམ་སྤྲུལ་ གསེར་ཀོང་རྡོ་རྗེ་འཆང་ཚུལ་ཁྲིམས་དོན་ལྡན་དང་། ཨོ་རྒྱན་གུ་རུ་རིན་པོ་ཆེའི་རྒྱལ་ཚབ་ གཏེར་བཏོན་བསོད་ནམས་རྒྱལ་པོ་ ལས་རབས་གླིང་པ་གཉིས་ཟུང་དུ་འཇུག་སྟེ་འབྱོན་པའི་ དཔལ་ལྡན་འབྲུག་པའི་ ཆོས་ཀྱི་བདག་པོ་ ༧ སྐྱབས་རྗེ་བླ་མ་རིན་པོ་ཆེ། དགེ་བཤེས་དགེ་འདུན་རིན་ཆེན་མཆོག་གིས་ ལུང་བསྟན་དང་འཁྲིལ་ཏེ་ དབྱངས་པའི་སློབ་དཔོན་འཆི་མེད་དམ་ མཚན་གཞན་ ཡེ་ཤེས་རིན་ཆེན་མཆོག་གིས་ འགོ་འདྲེན་ཐོག་ལུ་ དུས་རབས་ ༢༠ པ་རབ་འབྱུང་ ༡༧ པའི་སྤྱི་ལོ་ ༡༩༩༧ གྱི་ལོ་ལུ་ གསར་བཞེངས་ཀྱི་ལཱ་ཚུ་འགོ་བཙུགས་ཡོདཔ་དང་། ལོ་ངོ་གསུམ་གྱི་ནང་འཁོད་ སྤྱི་ལོ་ ༢༠༠༠ རང་ཟླ་ ༥ པའི་ཚེས་བཟང་ལུ་ བཤད་གྲྭ་པ་ཚུ་ལུ་ ཉེ་བར་མཁོ་བའི་དཔེ་མཛོད་ཁང་དང་བཅས་ གསར་སྒྲུབ་མཛད་གནང་ཡོདཔ་མ་ཚད། རང་ཟླ་ ༢ པའི་ཚེས་ ༢ ལུ་གཙུག་ལག་ཁང་གསར་བཞེངས་སྒྲུབ་པའི་ བཀྲ་ཤིས་རབ་གནས་ཡང་ མཛད་གནང་ཡོད་པའི་ ལོ་རྒྱུས་འདུག།

ཨིན་རུང་ ཧེ་མའི་གདན་ས་རྙིངཔ་འདི་ ད་རེས་དཔེ་མཛོད་ཁང་ཡོད་མི་ས་ཁོངས་འདི་ནང་ཨིན་པའི་ ལོ་རྒྱུས་བཤད་སྲོལ་ཡོདཔ་དང་། སློབ་དཔོན་ཀུན་བཟང་ཕྲིན་ལས་ཀྱིས་ དད་པའི་ས་བོན་ཟེར་མི་ དཔེ་དེབ་ཀྱི་དོན་ལུ་ བསྡུ་སྒྲིག་འབད་མི་ཟིན་འབྲི་ནང་ལུ་བཀོད་ཡོད་མི་དང་འཁྲིལ་བ་ཅིན་ རབ་བྱུང་ ༦ པའམ་དུས་རབས་ ༡༤ པའི་སྐོར་ཆ་ལུ་ འབྲུག་རྒྱལ་ཁབ་འདི་ནང་བྱོན་མི་ སྔ་འགྱུར་རྙིང་མའི་ཤིང་རྟ་ཆེན་པོ་ ཀུན་མཁྱེན་ཀློང་ཆེན་རབ་འབྱམས་ཀྱི་ གདན་ས་གཙོ་བོ་གླིང་བརྒྱད་ཡོད་པའི་གྲས་ལས་ གཅིག་ཨིནམ་འབད་ བཀོད་དེ་འདུག།

ཟིན་བྲིས་དང་འཁྲིལ་བ་ཅིན་ མཁོ་ཐང་ཁ་ལུ་ ཀུན་མཁྱེན་ཀློང་ཆེན་རབ་འབྱམས་ཀྱི་གདན་ས་འདི་ གཅིག་རྐྱངམ་གཅིག་ཡོད་ནི་འདི་གིས་ རིན་ཆེན་གླིང་དང་པདྨ་གླིང་ཟེར་མི་གཉིས་ཡང་ གཅིག་ཨིནམ་སྦེ་ ཆ་བཞག་དགོཔ་འདུག་ཟེར་གསུངས་ཡོད་པའི་ ཁུངས་གཏུགས་ཀྱི་ཡིག་ཆ་དེ། པདྨ་གླིང་པའི་རྣམ་ཐར་འོད་ཟེར་ཀུན་མཛེས་དང་ སྒང་སྟེང་དགོན་པའི་རྡོར་སློབ་བགྲེས་པ་ སློབ་ཕུར་རྒྱས་ཀྱི་ཕྱག་ལུ་ཡོད་མི་ སྔ་འགྱུར་རྙིང་མའི་ཆོས་འབྱུང་ ཡི་གུ་དབུ་མེད་འབད་མི་ནང་ ཀློང་ཆེན་པའི་མཛད་རྣམ་བཀོད་དེ་ཡོད་མི་ལྟར་དུ་འབད་བ་ཅིན་ མཁོ་ཐང་རིན་ཆེན་གླིང་ཟེར་མེན་པར་ མཁོ་ཐང་པདྨ་གླིང་ཟེར་བཀོད་དེ་འདུག། རྩོམ་སྒྲིག་པའི་གནང་མི་ཟིན་བྲི་ནང་ བཀོད་དེ་འདུག།

ཨིན་རུང་ མི་སྡེ་བརྡ་རྒྱུད་ཕེགས་སྦུག་ཐོག་ཡོད་པའི རྫོང་ཁའི་སྨྱུག་སྡེ་ནང་ལུ་ ཀུན་མཁྱེན་ཀློང་ཆེན་རབ་འབྱམས་ཀྱི་རྣམ་ཐར་མདོར་བསྡུས་ཟེར་མི་ རྩོམ་ཤོག་ནང་ལུ་འབད་བ་ཅིན་ ཀུན་མཁྱེན་ཀློང་ཆེན་རབས་འབྱམས་ཀྱི་གདན་ས་གླིང་བརྒྱད་བརྩི་ཚུལ་དེ། ཀུ་རེ་སྟོད་ཀུན་བཟང་གླིང་། མེ་ལོག་ཀུན་བཟང་གླིང་། ཤིང་མཁར་བདེ་ཆེན་གླིང་། མོན་ཡུལ་བབ་རོན་ཐར་པ་གླིང་། སྤ་གྲོ་བསམ་གཏན་གླིང་། སྔན་ལུང་འབྲས་བཅགས་གླིང་། སྟངས་ཨོ་རྒྱན་ཆོས་གླིང་། ཁོ་ཐང་རིན་ཆེན་གླིང་། བཅས་བརྩི་ཚུལ་བཀོད་དེ་འདུག།

བཤད་གྲྭ་འགོ་བཙུགས་ཞིནམ་ལས་ ད་ལྟོ་ཚུན་གྱི་གནས་སྟངས།

ད་ལྟོ་ བཤད་གྲྭ་འདི་ནང་ལུ་ སློབ་དཔོན་གོངམ་སྦེ་ཕྱག་ཞུ་བའི་བསྒང་ཨིན་མི་ སློབ་དཔོན་རིན་འཛིན་རྡོ་རྗེ་གིས་འབད་བ་ཅིན་ སྤྱི་ལོ་ ༢༠༠༠ ལས་འགོ་བཙུགས་མི་ མཐོ་རིམ་བཤད་གྲྭ་ནང་ལུ་ ད་ལྟོ་ཚུན་ཚོད་ཀྱི་བར་ན་ དབུ་འཛིན་རིམ་ཐེངས་ ༥ ནང་ལྷོད་ཡོད་པའི་སྐོར་དང་། དབུ་འཛིན་ཚུ་ཡང་ དང་པ་ར་ གདན་ས་འདི་གི་འགོ་འདྲེན་པ་བྱངས་པའི་སློབ་དཔོན་འཆི་མེད་ གཉིས་པ་སྤ་རོ་གནས་བསྟན་སྤེན་པ་ཚེ་རིང་། གསུམ་པ་ད་ལྟོ་ཁྲི་ཐོག་ལུ་ཚོགས་ཀྱི་སློབ་དཔོན་གྱི་ཕྱག་འགན་བཞེས་ཏེ་བཞུགས་མི་ མཁན་པོ་མཁའ་འགྲོ་དང་། བཞི་པ་མཁན་པོ་བསྟན་འཛིན་ཆོས་གྲགས། ལྔ་པ་ད་ལྟོ་ཁྲི་ཐོག་ལུ་དབུ་དཛིན་གྱི་ཕྱག་འགན་བཞེས་མི་མཁན་པོ་གེ་སར་རྡོ་རྗེ། བཅས་ལྔ་ཨིན་པས། དེ་མ་ཚད་ སློབ་དཔོན་ ༡༨ དང་། དགེ་སློང་ཞལ་གྲངས་ ༣༢༠ ཡོདཔ་སྦེ་བཤད་ནི་འདུག།

དུས་མཆོད་འབུམ་སྡེའི་སྐོར།

གོང་གི་སློབ་དཔོན་གོངམ་གིས་ བཤད་དོ་བཟུམ་འབད་བ་ཅིན་ བཤད་གྲྭ་འདི་ནང་ལུ་ སྤྱིར་འཛམ་བུ་གླིང་རྒྱལ་ཁབ་ག་ར་དང་། ལྷག་པར་དུ་ ང་བཅས་རའི་རྒྱལ་ཁབ་ནང་ མི་དབང་སྐུ་འཁོར་ལྷན་རྒྱས་དང་། སྐྱབས་རྗེ་རིན་པོ་ཆེ་མཆོག། འབྲུག་གི་བློན་ཆེན་དང་། སྤྱིར་བཏང་མི་སེར་ཚུ་ལུ་ ནད་ཡམས་མུ་གེ་ཚུ་མི་འབྱུང་ནིའི་དོན་ལུ་ ལོ་ཨ་རྟག་ར་འབྲུག་ཟླ་ ༣ པའི་ཚེས་ ༡༥ ལུ་ ཞབས་དྲུང་རིན་པོ་ཆེའི་སྐུ་མཆོད། འབྲུག་ཟླ་ ༤ པའི་ཚེས་ ༡༥ ལུ་ ས་ག་ཟླ་བའི་དུས་ཆེན། གུ་རུ་རིན་པོ་ཆེའི་དུས་བཟང་ཁྱད་པར་ཅན་ སྤྲེལ་ཟླ་ཚེས་བཅུ་དང་། དྲུགཔ་ཚེས་བཞིའི་དུས་ཆེན། དེ་ལས་ རྒྱལ་བ་ལྷ་ལས་འབབས་པའི་དུས་ཆེན་ཚུ་ རྩི་བསྲུང་ཞུ་ཞིན་ཡོདཔ་མ་ཚད། ལྷག་པར་དུ་སྟོན་ཟློག་ཟེར་ ཡེ་ཤེས་མགོན་པོའི་ཚེས་བཅུ་ཉིན་གྲངས་ ༣ གི་རིང་ བརྩི་སྲུང་ཞུ་སྲོལ་འདུག།

༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽

Source : Department of Culture and Dzongkha Development.

རྒྱབ་རྟེན་དཔེ་ཐོ།

༡༽   ཤར་མཁོ་ཐང་ཁའི་གནས་བཤད་བསྡུས་པ་དད་པའི་མིག་བྱེད། (གནམ་ལོ་མེད། ཤོག་གྲངས་ ༦-༡༦ པའི་ནང་ལུ་) དཔེ་སྐྲུན་རིན་ཆེན་གླིང་དཔེ་མཛོད།

༢༽   རིན་འཛིན་རྡོ་རྗེ་ འགྲུལ་འཕྲིན་ཐོག་ལུ།

༣༽   སློབ་དཔོན་ཀུན་བཟང་ཕྲིན་ལས་ཀྱི་ཟིན་བྲིས།