ཚེ་རིང་ཕུན་ཚོགས། (ཕོ་འཁྲབ་རྩེདཔ།)
འཁྲབ་རྩེདཔ་ ཚེ་རིང་ཕུན་ཚོགས།
རྣམ་འགྱུར་སྟོན་ནིའི་ནང་མཁས་མཆོག་ཡོད་མི་ འབྲུག་པའི་གློག་བརྙན་ནང་གི་ཕོ་འཁྲབ་རྩེདཔ་ ཚེ་རིང་ཕུན་ཚོགས་འདི་ ཆུ་ཁ་རྫོང་ཁག་ནང་ལས་ཨིན་མས། ཚེ་རིང་ཕུན་ཚོགས་ཁོ་ར་སྤྱི་ལོ་ ༢༠༠༧ གྱི་ལུ་མཐོ་རིམ་སློབ་གྲྭ་མཐར་འཁྱོལཝ་ཅིག་ འབྲུག་གློག་བརྙན་ཚོགས་པ་ནང་ལུ་འཛུལ་ཞུགས་འབད་ནུག། ཁོ་གི་གློག་བརྙན་གོ་དང་པ་ར་ ཡིད་ཤེས་བཟོ་སྐྲུན་གྱིས་བཟོ་ཡོད་པའི་གློག་བརྙན་ སེང་གེ་དང་དགའ་ལེགསམོ་ཐོན་རིམ་ ༣ པ་ནང་ལུ་ ལྡོག་ཕྱོགས་འཁྲབ་རྩེདཔ་སྦེ་བརྩེས་ནུག། དེ་ཡང་ བཀོད་ཁྱབ་མདོ་ཆེན་ཚེ་འདས་ཚེ་རིང་དབང་རྒྱལ་གྱིས་ གོ་སྐབས་ཅིག་བྱིན་ཡོདཔ་ལས་ ཁོ་གི་སེམས་ལས་བཀའ་དྲིན་དགའ་ཚོར་ནམ་ཡང་མི་བརྗེད་ཟེར་བཤདཔ་ཨིན་མས། ཁོ་ར་ཆུང་སུ་སྦེ་སྡོདཔ་ད་ ཁོ་རའི་ལྕོགས་གྲུབ་ཚུ་ཕྱི་ཁར་སྟོན་ནིའི་ནང་ གཡང་ཟ་སྟེ་སྡོད་སྡོདཔ་ཨིན་རུང་ ཁོ་ར་ལུ་ཡོད་པའི་ལྕོགས་གྲུབ་འདི་གདོང་གཟང་སྟེ་ གློག་བརྙན་ཐོག་ལས་སྦེ་ཕྱི་ཁར་སྟོན་པའི་བསྒང་ལས་ འབྲུག་ལུ་ཕོ་འཁྲབ་རྩེདཔ་ཡོངས་གྲགས་ཅན་ཅིག་ལུ་གྱུར་སོ་ནུག། ཚེ་རིང་ཕུན་ཚོགས་ཀྱི་འབྲུག་གི་གློག་བརྙན་ ༥༥ དེམ་ཅིག་ནང་ལུ་བཅའ་མར་གཏོགས་ཡོདཔ་དང་ སྤྱི་ལོ་ ༢༠༡༠ གྱི་ལོ་ལུ་ གློག་བརྙན་ཧ་གོ་གནང་སྨེ་ཟེར་མི་ནང་ལས་ འཁྲབ་རྩེདཔ་རྒྱབ་སྐྱོར་པ་དྲག་ཤོས་ཀྱི་གསོལ་ར་ཡང་ཐོབ་ནུག།
ཚེ་རིང་ཕུན་ཚོགས་ཁོ་ར་ འཁྲབ་རྩེདཔ་འབད་ནི་དང་ རྣམ་འགྱུར་སྟོན་ནིའི་ལྕོགས་གྲུབ་རྐྱངམ་གཅིག་མེན་པར་ གློག་བརྙན་གྱི་བཀོད་ཁྱབ་མདོ་ཆེན་སྦེ་ཡང་ཕྱག་ཞུ་དོ་ཡོདཔ་ཨིན། ཁོ་གིས་ གློག་བརྙན་འགོ་དང་པ་ དབའི་བླ་མ་དཀོན་མཆོག་ཟེར་མི་འདི་བཀོད་ཁྱབ་འབད་དེ་ སྤྱི་ལོ་ ༢༠༡༥ ལུ་འབྲུག་གློག་བརྙན་ཚོགས་པའི་བཀོད་ཁྱབ་དྲག་ཤོས་ཀྱི་གདམ་འཐུ་ནང་ཚུད་ནུག།
ཚེ་རིང་ཕུན་ཚོགས་ཀྱིས་ འབྲུག་གི་གསུང་སྐད་ཟེར་ འཁྲབ་རྩེདཔ་བཙན་སྐྱོགས་རྡོ་རྗེ་གིས་འགོ་འདྲེན་འཐབ་ཡོད་པའི་གསུང་སྐད་འགྲན་བསྡུར་གྱི་འཁྲབ་སྟོན་མདོ་ཆེན་སྦེ་ཡང་ཕྱག་ཞུ་དོ་ཡོདཔ་ཨིན་མས།
རྒྱབ་རྟེན།
འབྲུག་ས་སྨུག། (༢༠༢༢) གློག་བརྙན་ནུབ་གཅིག། https://www.samuhbhutan.com/show
འབྲུག་གི་གློག་བརྙན། (༢༠༡༧) ཚེ་རིང་ཕུན་ཚོགས། https://www.movies.bt
འབྲུག་གློག་བརྙན། (2020) འབྲུག་གི་སྙན་གྲགས་ཅན་གྱི་མི། https://www.facebook.com