ཇ་པཱན་རྒྱལ་སྤྱི་མཉམ་འབྲེལ་ལས་སྡེ།

༉ ཇ་པཱན་རྒྱལ་སྤྱི་མཉམ་འབྲེལ་ལས་སྡེ་འདི་ ཇ་པཱན་གཞུང་གི་དོན་ལུ་ གཞུང་དོན་གོང་འཕེལ་གྱི་གྲོགས་རམ་གནང་མི་གཞུང་གི་ལས་སྡེ་ཅིག་ཨིན། དེ་ཡང་ ཡར་རྒྱས་འགྱོ་བའི་བསྒང་ཡོད་མི་རྒྱལ་ཁབ་ཚུ་ནང་ མི་སྡེ་དང་དཔལ་འབྱོར་གོང་འཕེལ་དང་ རྒྱལ་སྤྱི་མཉམ་འབྲེལ་རྒྱ་སྐྱེད་ཀྱི་དོན་ལུ་གྲོགས་རམ་འབད་ནི་འདི་ཨིན། དཔལ་འབྱོར་མཉམ་འབྲེལ་དང་གོང་འཕེལ་ལས་སྡེའི་ གོང་འཕེལ་གྲོགས་རམ་ཚོགས་ཆུང་གིས་ སྤྱི་ལོ་ ༢༠༢༠ སྤྱི་ཟླ་ ༡༠ པའི་ནང་ ཇ་པཱན་མཉམ་འབྲེལ་ལས་སྡེའི་བསྐྱར་ཞིབ་མཐིལ་ཕྱིནམ་ཅིག་དཔེ་སྐྲུན་འབད་དེ་ཡོདཔ་ཨིན། དེ་ཡང་ སྤྱི་ལོ་ ༢༠༡༥ ལས་ ཇ་པཱན་རྒྱལ་སྤྱི་གཙུག་ལག་སློབ་སྡེའི་གཙོ་འཛིན་བགྲེསཔ་ མཁས་དབང་ཤི་ནི་ཅི་ཀི་ཀྲའོ་ཀ་གིས་འགོ་ཁྲིད་འབད་ཡོདཔ་ཨིན།
ཧེ་མམ་གི་ཇ་པཱན་རྒྱལ་སྤྱི་མཉམ་འབྲེལ་ལས་སྡེ་འདི་ གཞུང་ཕྱེད་ལས་ཚོགས་ཨིནམ་ད་ དེ་ཡང་ ཕྱི་འབྲེལ་ལྷན་ཁག་གི་འོག་ལུ་ སྤྱི་ལོ་ ༡༩༧༤ ལུ་གཞི་བཙུགས་འབད་ནུག། ད་ལྟོ་ཡོད་པའི་ ཇ་པཱན་རྒྱལ་སྤྱི་མཉམ་འབྲེལ་ལས་སྡེ་གསརཔ་འདི་ སྤྱི་ལོ་ ༢༠༠༣ སྤྱི་ཟླ་ ༡༠ པའི་སྤྱི་ཚེས་ ༡ ལུ་གཞི་བཙུགས་འབད་ཡོདཔ་ཨིན། སྤྱི་ལོ་ ༢༠༠༨ སྤྱི་ཟླ་ ༡༠ པའི་སྤྱི་ཚེས་ ༡ ལུ་མཇུག་བསྡུ་ཞིནམ་ལས་ཚུར་ ཇ་པཱན་རྒྱལ་སྤྱི་མཉམ་འབྲེལ་ལས་སྡེ་འདི་ འཛམ་བུ་གླིང་ནང་ གོང་འཕེལ་གྱི་ལས་སྡེ་སྦོམ་ཤོས་ཅིག་ལུ་གྱུར་ཡོདཔ་ད་ དེ་ཡང་ རྒྱལ་ཁབ་ ༡༥༠ དང་ ཕྱི་རྒྱལ་གྱི་ཡིག་ཚང་ ༩༧ དེ་ཅིག་ལས་ཕར་ ལས་འགུལ་ཚུ་ཡོདཔ་མ་ཚད་ དངུལ་འབྲེལ་གྱི་ཐོན་ཁུངས་ ཡུ་ཨེསི་ཌོ་ལར་ཐེར་འབུམ་ ༨.༥ དེ་ཅིག་ཡོདཔ་ཨིན། ད་ལྟོ་ཕྱི་འབྲེལ་ལྷན་ཁག་གི་འོག་ལུ་ཡོད་པའི་ བསྐྱར་བཟོ་འབད་ཡོད་པའི་ལས་སྡེ་འདི་ལུ་ ཇ་པཱན་གྱི་གྲོགས་གྱི་ལས་སྣ་ཚུ་ འཛིན་སྐྱོང་འཐབ་ནིའི་འགན་ཁུར་ཡང་ཕོགཔ་ཨིན། ཇ་པཱན་རྒྱལ་སྤྱི་མཉམ་འབྲེལ་ལས་སྡེ་གསརཔ་འདི་གིས་ མ་འོངས་པའི་ནང་ རྒྱལ་སྤྱི་གོང་འཕེལ་ཐབས་རིག་དང་ རྒྱལ་སྤྱིའི་གཙུག་སྡེ་དང་ཅིག་ཁར་མཉམ་འབྲེལ་རྒྱ་སྐྱེད་ཚུའི་ནང་ལྷན་ཐབས་ཚུ་འབད་དེ་ ཞིབ་འཚོལ་དང་སྦྱོང་བརྡར་གྱི་ལྕོགས་གྲུབ་ཚུ་ཡང་རྒྱ་སྐྱེད་གཏང་ནི་ཨིན་མས།
ཇ་པཱན་རྒྱལ་སྤྱི་མཉམ་འབྲེལ་ལས་སྡེ་འདི་གིས་ གཞི་བཙུགས་འབད་བའི་ཉིནམ་ལས་འགོ་བཟུང་ ཕྱི་རྒྱལ་གྱི་མི་མང་ལས་བྱེདཔ་དང་ཞིབ་འཚོལ་པ་ བཟོ་རིག་འགོ་དཔོན་ སློབ་སྟོན་པ་ མི་སྡེ་འགོ་ཁྲིདཔ་ཚུ་རྩིས་ཏེ་ ཡོངས་བསྡོམས་ ༨༠༠༠ དེ་ཅིག་ལུ་སྦྱོང་བརྡར་ཚུ་བྱིན་ཏེ་ཡོདཔ་ཨིན་མས།
ད་ལྟོ་ ལས་སྡེ་འདི་གིས་ ཁོང་རའི་རྒྱལ་ཁབ་ཀྱི་ཡིག་ཚང་ཚུ་ནང་ལས་ཕར་ ལག་ལེན་དང་ལས་སོགས་ཀྱི་འགྱུར་བཅོས་ཚུ་འབད་བའི་བསྒང་ར་འདུག། དེ་མ་ཚད་ ཇ་པཱན་རྒྱལ་སྤྱི་མཉམ་འབྲེལ་ལས་སྡེའི་སྲིད་འཛིན་ ས་ད་ཀོ་ཨོ་ག་ཏ་གིས་སླབ་མིའི་ནང་ ཇ་པཱན་རྒྱལ་སྤྱི་མཉམ་འབྲེལ་ལས་སྡེའི་ལས་རིམ་དང་ལས་འགུལ་ཡར་སེང་འགྱོ་དོ་ཡོད་མི་འདི་ མིའི་ཉེན་སྲུང་བྱིན་ནིའི་དོན་ལུ་ཨིན་ཟེར་ཨིན་མས།
ད་ལྟོ་ཚུན་ཚོད་ཀྱི་རིང་ལུ་ ཇ་པཱན་རྒྱལ་སྤྱི་མཉམ་འབྲེལ་ལས་སྡེའི་སྲིད་འཛིན་རིམ་ཐེངས་གསུམ་བྱོན་ཡོདཔ་ད་ དེ་ཡང་ སྤྱི་ལོ་ ༢༠༠༣ ལས་ ༢༠༡༢ ཚུན་ ས་ད་ཀོ་ཨོ་ག་ཏ་དང་ སྤྱི་ལོ་ ༢༠༡༢ ལས་ ༢༠༡༥ ཚུན་ ཨ་ཀི་ཧི་ཀོ་ཏ་ན་ཀ་ དེ་བཟུམ་སྦེ་ སྤྱི་ལོ་ ༢༠༡༥ ལས་ད་ཚུན་གྱི་རིང་ལུ་ ཤི་ནི་ཅི་ཀི་ཀྲའོ་ཀ་ཚུ་ཨིན་མས།
ཇ་པཱན་རྒྱལ་སྤྱི་མཉམ་འབྲེལ་ལས་སྡེ་འདི་ ཁྱད་རིག་མཉམ་འབྲེལ་དང་ མ་རྩ་གྲོགས་རམ་ ཡེན་གྱི་སྐྱིན་འགྲུལ་ཚུ་བྱིན་མིའི་ ཇ་པཱན་གཞུང་དོན་གོང་འཕེལ་གྲོགས་རམ་གྱི་ཆ་ཤས་ཅིག་ཨིན། ཇ་པཱན་རྒྱལ་སྤྱི་མཉམ་འབྲེལ་ལས་སྡེ་གི་གོང་འཕེལ་ལས་རིམ་གཙོ་བོ་འདི་ར་ ལྕོགས་གྲུབ་དང་གཙུག་སྡེ་གོང་འཕེལ་ འོས་འབབ་ཅན་གྱི་ཤེས་ཡོན་དང་ འཆར་གཞི་ཨམ་ཚུ་གི་དོན་ལུ་ ཁྱད་རིག་གི་རྒྱབ་སྐྱོར་ལས་རིམ་དང་ལས་འགུལ་ཚུ་ཨིན། ཇ་པཱན་རྒྱལ་སྤྱི་མཉམ་འབྲེལ་ལས་སྡེའི་དམིགས་སྐྱེད་དེ་ཡང་ ཇ་པཱན་དང་ གོང་འཕེལ་འགྱོ་བའི་གི་རྒྱལ་ཁབ་ཀྱི་མི་ཚུ་གི་བར་ན་ ཟམ་ཅིག་ཨིན་པའི་ཆ་ལས་ ཡོན་ཏན་དང་ཉམ་མྱོང་ཚུ་བརྗེ་སོར་འབད་ཐོག་ལས་ རྒྱལ་སྤྱི་མཉམ་འབྲེལ་འདི་རྒྱ་སྐྱེད་གཏང་ནི་དང་ དགའ་སྐྱིད་དང་ཞི་བདེ་ཅན་གྱི་འཛམ་གླིང་ཅིག་སྦེ་བཟོ་ནིའི་ནང་ ལཱ་ཚུ་འབད་ནི་འདི་ཨིན།
ཇ་པཱན་རྒྱལ་སྤྱི་མཉམ་འབྲེལ་ལས་སྡེ་གིས་ གོང་འཕེལ་འགྱོ་བའི་བསྒང་ཡོད་མི་རྒྱལ་ཁབ་ཚུ་ནང་ལས་མཅའ་མར་བཏོགས་མི་ཚུ་ལུ་ གསོ་བ་དང་བཟོ་གྲྭ་ སོ་ནམ་ལ་སོགས་པ་ཚུའི་ནང་སྦྱོང་བརྡར་ཚུ་ཡང་བྱིནམ་ཨིན། སྦྱོང་བརྡར་ཚུ་ཡང་ ཇ་པཱན་ནང་འཁོད་ལུ་སྦྱོང་བརྡར་དང་ སྡེ་ཚན་སྦྱོང་བརྡར་ ངོ་རྐྱང་སྦྱོང་བརྡར་ ལ་སོགས་པ་ཚུ་བྱིནམ་ཨིན།

ཇ་པཱན་རྒྱལ་སྤྱི་མཉམ་འབྲེལ་ལས་སྡེ་ལུ་ བཅའ་མར་བཏོགས་མི་ཚུ་གི་དོན་ལུ་ ཁོང་རའི་ སྡོད་སའི་མཐུན་རྐྱེན་ཚུ་ཡོདཔ་ད་ དེ་ཡང་ མང་ཤོས་ཅིག་ར་ ཇ་པཱན་ལུ་གལ་གནད་ཅན་གྱི་ཁྲོམ་ཚུ་ནང་ལས་ཕར་ཡོདཔ་ཨིན། དེ་འབདཝ་ལས་ འདི་ལུ་ རྒྱལ་སྤྱིའི་ལྟེ་བ་ཟེར་ཡང་སླབ་ཨིན། ཊོ་ཀི་ཡོ་རྒྱལ་སྤྱི་ལྟེ་བ་འདི་ ཧ་ཏ་ག་ཡ་ལུ་ཡོདཔ་ཨིན། མཐུན་རྐྱེན་འདི་ཚུ་ཡང་ སྤུས་ཚད་ཅན་ཙང་ཙ་ཡོདཔ་ད་ ཁ་གསལ་ཚུ་ ཇ་པཱན་རྒྱལ་སྤྱི་མཉམ་འབྲེལ་ལས་སྡེའི་ཡོངས་འབྲེལ་འཆར་སྒོ་ནང་ཡོད།

ཁུངས་གཏུག།

Wikipedia contributors. (2021). Japan International Cooperation Agency. In Wikipedia, The Free Encyclopedia. Retrieved from https://en.wikipedia.org/w/index.php?title=Japan_International_Cooperation_Agency&oldid=1063894578