ཁྱི

༉ གཞལ་སྒང་ཁྲོམ་ཁ་ལུ་ སྤྱང་ཁྱི་གི་གྱངས་ཁ་ ཡར་སེང་འགྱོ་དོ་ཡོད་མི་གི་ཐད་ཁར་ ཁྲོམ་འདི་ནང་སྡོད་མི་ཚུ་ ཚ་འགྱང་ལང་སྟེ་སྦེ་འདུག འདི་ཡང་ ཁྲོམ་འདི་ནང་སྡོད་མི་ཚུ་གིས་སླབ་མི་ནང་ སྤྱང་ཁྱི་ཚུ་ལས་བརྟེན་ཏེ་ འཆོལ་ནད་ཁྱབ་སྤེལ་མི་འགྱོ་ག་ཟེར་བའི་ ཚ་འགྱང་ཡོདཔ་སྦེ་བཤད་ཅི། འདི་མ་ཚད་ ཁྲོམ་གྱི་ས་གོ་ ཐདམ་ཐད་ཁ་ལས་ཕར་ སྤྱང་ཁྱི་ཚུ་འཁྱམས་སྡོད་སར་མཐོང་དོ་ཡོད་མི་དང་བསྟུན་ ས་གོ་འདི་ཚུའི་ནང་ལས་ཕར་ རྐང་སྟོང་སྦེ་འགྱོ་ནི་འདི་ཡང་ ཉེན་སྲུང་དང་ལྡནམ་ཅིག་ མིན་འདུག་ཟེར་ཨིན་མས། རོ་ཁྱི་གིས་ སོ་བཏབ་འོང་མནོ་བའི་ཚ་འགྱང་གིས་ ཁྲོམ་འདི་ནང་སྡོད་མི་ཚུ་གིས་ གནམ་ཉི་མ་རང་འབད་རུང་ རྐང་སྟོང་སྦེ་འགྱོ་བའི་སྐབས་ སྡེ་ཚན་སྦེ་འགྱོ་དགོཔ་འཐོན་དོ་ཡོད་པའི་ཁར་ རང་རྐྱངམ་ཅིག་སྦེ་འགྱོ་བ་ཅིན་ སྤྱང་ཁྱི་ལས་ཉེན་སྲུང་གི་དོན་ལུ་ ལག་པར་ ཁརཝ་འབག་སྟེ་ འགྱོ་དགོཔ་འཐོན་ཏེ་སྦེ་འདུག འདི་ཡང་ ས་གནས་འདི་ནང་ལུ་ སྤྱང་ཁྱི་གི་གྱངས་ཁ་ ལེ་ཤ་གིས་ ཡར་སེང་འགྱོ་སྟེ་ཡོད་མི་ལུ་བརྟེན་ཏེ་ཨིནམ་སྦེ་བཤད་ཅི། ད་རུང་ མི་ཚུ་གིས་སླབ་མི་ནང་ གནམ་ནུབ་མོ་རང་འབད་རུང་ སྤྱང་ཁྱི་ཚུ་ཧབ་དོ་ཡོདཔ་ལས་ དམིགས་བསལ་གྱི་ ཨ་ལུ་ཚུ་ ཞག་ཉལ་མ་ཚུགས་པའི་ གདོང་ལེན་བྱུངམ་མས་ཟེར་ཨིན་མས། འདི་བཟུམ་སྦེ་ ཁྲོམ་འདི་ནང་སྡོད་མི་ཚུ་གིས་བཀོད་མི་ནང་ ན་ཧིང་དང་འཕྱདཔ་ད་ ད་རེས་ ཁྲོམ་གྱི་ས་གོ་ནང་ལུ་ སྤྱང་ཁྱི་གི་གྱངས་ཁ་འདི་ ལེ་ཤ་གིས་ ཡར་སེང་འགྱོ་སྟེ་ཡོདཔ་སྦེ་ཨིན་མས། རྫོང་ཁག་སྒོ་ནོར་འགོ་དཔོན་ ཨྱོན་ལྷུན་གྲུབ་ཀྱིས་སླབ་མི་ནང་ གཞལ་སྒང་ཁྲོམ་ཁ་ལུ་ ལོ་བསྟར་བཞིན་དུ་རང་ རོ་ཁྱི་ཚུ་ལུ་ འཆོལ་ནད་སྔོན་འགོག་གི་སྨན་ཁབ་རྐྱབ་ནི་གི་ལས་རིམ་ཚུ་ འགོ་འདྲེན་འཐབ་དོ་ཡོདཔ་ལས་ ཁྲོམ་འདི་ནང་ འཆོལ་ནད་ཁྱབ་སྤེལ་འགྱོ་ནི་གི་ཉེན་ཁ་འདི་ དེ་ཅིག་རང་མེད་ཟེར་བཤད་ཅི། འདི་ཡང་ ན་ཧིང་ གཞལ་སྒང་ཁྲོམ་རྐྱངམ་ཅིག་ནང་རང་ སྤྱང་ཁྱི་༣༤༠དེ་ཅིག་ལུ་ སྨན་ཁབ་ཚུ་བཙུགས་ཏེ་ཡོདཔ་སྦེ་ཨིན་མས། ལོག་ཅི་ཁ་ལས་བལྟ་བ་ཅིན་ གཞལ་སྒང་སྨན་ཁང་ནང་ལུ་ ཟླཝ་རེ་ནང་ རོ་ཁྱི་གིས་སོ་བཏབ་ཡོད་པའི་གནད་དོན་༤དེ་རེ་ འཐོན་དོ་ཡོདཔ་སྦེ་མཐོང་ནུག