ཁེངས་བུ་ལི་མཚོ། Kheng Buli Tsho
ངོ་སྤྲོད།
ཞུན་དགམཚོ་སྨན་ཀུན་ཏུ་བཟང་མོ་ཟེར་ཡོངས་གྲགས་ལུ་བུ་ལི་སྨན་མོ་ཟེར་མི་འདི་བུ་ལི་མཚོ་གི་སྲུང་མ་ཨིན། བུ་ལི་མཚོ་འདི་ལྷོ་ཕྱོགས་ཁེངས་བུ་ལི་ལུ་ས་གནས་སྦིར་སྤང་ཟེར་སའི་ནགས་ཚལ་སྟུག༌པག༌པ༌གི༌སྦུག་ལུ་ ས་ཆ་ཨེ་ཀར་ ༤.༤ གི་ནང་ལུ་ཆགས་ཏེ་ཡོདཔ་ཨིན། ས༌གནས༌འདི༌རྒེད༌འོག༌
ལྟེ༌བ༌ནང༌གི་ཕྲང༌ལམ༌བདའ༌སྣུམ༌འཁོར༌ནང༌འགྱོ༌བ༌ཅིན༌སྐར༌མ༌ ༡༥ དང༌རྐང༌སྟོང༌སྦེ༌འགྱོ༌བ༌ཅིན༌སྐར༌མ༌ ༣༠ འགོརཝ༌ཨིན༌མས། ས་གནས་ཀྱི་སྲུང་མ་མཚོ་སྨནམ་ཀུན་ཏུ་བཟང་མོ་འདི་སྐུ་གཟུགས་ཆ་ཚང་སྦེ་སེམས་ཅན་གྱི་རྣམ་པ་སྦེ་ཡོད་མི་ནང་ལས་ མོ་གི་གཟུགས་སྟོད་ཕྱེད་འདི་སྦུལ་གྱི་བླ་རེ་གིས་མཚོན་ཏེ་ཡོདཔ་དང་ གཟུགས་སྨད་ལྟེཝ་གི་འོག་ལས་མར་སྦུལ་དང་ཅོག་ར་འཐདཔ་སྦེ་སྒོར་བསྒྲིལ་འབད་དེ་ཡོདཔ་ཨིན་མས། མོ་གི་མིའི་གཟུགས་འདི་གོས་ཆེན། མཛེས་རྒྱན། གཡུ། བྱུ་རུ་དང་ དེ་ལས་མོ་གི་དབུ་ཐོད་འདི་མེ་ཏོག་གི་ཕྲེང་བ་ཚུ་གིས་ག་ནི་བ་མཛེས་ཏོག་ཏོ་སྦེ་བརྒྱན་ཏེ་ཡོདཔ་ཨིན། གལ་སྲིད་མི་ཚུ་གིས་མོ་ལུ་སྐྱབས་འཚོལ་བ་ཅིན་ མོ་ཧ་ལམ་ལྷ་ཕྱེད་བཟུམ་ཨིནམ་ལས་མོ་གིས་རྒྱུ། འཕྲོད་བསྟེན་དང་ཕུན་ཚོགས་ཚུ་བྱིན་ཚུགསཔ་མ་ཚད་ འགལ་རྐྱེན་དང་ན་ཚ་ཚུ་ལས་སྲུང་སྐྱོབ་འབད་དེ་དགའ་སྐྱིད་བྱིན་ཚུགསཔ་ཨིན་མས།
བྱུང་རབས།
ཞུན་དགངག་ཐོག་གི་རྒྱུ་ཁུངས་དང་འཁྲིལཝ་ད་ལུ་མཚོ་སྨན་ཀུན་ཏུ་བཟང་མོ་འདི་ཁེངས་བུ་ལི་ལུ་བྱོན་དགོཔ་ཨིན་ཟེར་ཨིན་མས། ས་གནས་ཁེངས་བུ་ལི་ལུ་མཚོ་སྨན་ཀུན་ཏུ་བཟང་མོ་འདི་ནམ་ཕེབས་ཡོདཔ་ཨིན་ན་མ་ཤེས་རུང་ ལོ་རྒྱ྄ས་སྦེ་སླབ་ད་མོ་བོད་བྱང་ཕྱོགས་ཤམ་བྷ་ལ་ལས་བྱོན་ཡོདཔ་ཨིན་ཟེར་སླབ་ཨིན་མས། དེ་ཡང་མཚོ་སྨནམ་འདི་བོད་ཤམ་བྷ་ལ་ལས་ལྷུན་རྩེ་ལུ་བྱོན་ཞིན་ན་དེ་ལས་སྐུར་སྟོད་དུང་དཀར་བརྒྱུད་ཞིན་ན་ སྟང་ཀུན་བཟང་བྲག་ལས་སྦེ་བུམ་ཐང་ཟུར་རི་ལུ་ཕེབས་ཞིནམ་ལས་ སྐུ་ངལ་ཅིག་གནང་ཞིན་ན་མོ་རིའ་ཨ་ལུ་ལུ་ཨོམ་བྱིན་ཡོད་པའི་ལོ་རྒྱུས་བཤདཔ་ཨིན་མས། དེ་ལས་བུམ་ཐང་ཟུར་རི་ལས་ནགས་ཚལ་སྟུག་དྲག་ཚུ་བརྒྱུད་དེ་བཱེརི་ཏི་ཀི་ཡ་གི་རི་རྩེ་འདི་བརྒལ་ཞིན་ན་ བཱའུཊ་སྒང་གི་ལུང་གཤོངས་ནང་ལུ་ཕེབས་ཏེ་་དོ་རུང་སྐུ་ངལ་ཅིག་གནང་ཞིན་ན་ཨ་ལུ་ལུ་ཨོམ་བྱིན་ཡོདཔ་ཨིན་མས། བཱའུཊ་སྒང་ལུ་མཚོ་སྨནམ་གིས་ཨང་རྒས་ཅིག་ལུ་སྤྲུལ་ཞིན་ན་ ཀྲོང་སྨད་ཀྱི་ཁྱིམ་ནང་ལུ་བྱོན་ཡོདཔ་ཨིན་མས། ཀྲོང་སྨད་ཀྱི་ཁྱིམ་ནང་ཕེབས་ད་ཨང་རྒས་ཅིག་མཐོང་སྟེ་དེ་ལུ་མོ་ལུ་གནསཔོ་ཅིག་བརྙ་གེ་ཟེར་སླབ་ད་ ཨང་རྒས་ཀྱིས་མོ་སྡོད་ས་ཅིག་བྱིན་ཡོད་རུང་མཚོ་སྨནམ་གིས་མོ་མཆོད་གཤམ་ནང་ལུ་སྡོད་དགོ་ཟེར་སླབ་སྦེ་ མཚོ་སྨནམ་མཆོད་གཤམ་ནང་ལུ་མ་བྱོན་པའི་ཧེ་མ་ཨང་རྒས་ལུ་ ནངས་པ་དྲོ་པ་ཚུན་ཚོད་མོ་དཀྲོགས་མ་གནང་ཟེར་སླབ་བཞག་ནུག། དེ་ལས་ནངས་པ་དྲོ་པ་ཆུ་ཚོད་ ༨ འགྱོ་རུང་མཚོ་སྨནམ་འདི་ལོང་ནི་མེདཔ་ལས་ཨང་རྒས་འདི་ཚ་གྱང་ལངས་ཏེ་ མཆོད་གཤམ་ཁ་ཐུག་ལུ་དོང་ཆུང་ཀུ་ཅིགཡོད་མི་ནང་ལས་ལས་མོ་གི་མགྱོནམོ་འདི་ག་ཅི་འབད་དཔ་ཨིན་ན་ཟེར་གཡིབ་ལྟ་ནུག། དེ་བསྒང་མོ་གིས་ལྟ་བའི་སྐབས་ལུ་སྦུལ་བཅུ་ཕྲག་ལས་བཅས་ཏེ་ཉལ་ཡོད་མི་གི་ལྟག་ལུ་ སྦུལ་སྦོམ་ཅིག་རྭ་དང་དཔྱལཝ་གུར་གཡུ་ཡོད་མི་ཅིག་སི་སྒྲ་བཏོན་ཏེ་སྡོད་ཡོདཔ་མཐོང་ནུག། དེ་ལས་མཚོ་སྨནམ་ཨང་རྒས་འདི་ལོང་འོང་ཞིན་ན་ཨང་རྒས་གནསམོ་ལུ་ ཨང་རྒས་ཁ་ཙ་ང་གིས་ཁྱོད་ལུ་ང་ག་ཅི་འབད་དོ་ག་དོང་ནང་ལས་གཡིབ་མ་ལྟ་ཟེར་སླབ་རུང་ཁྱོད་ཀྱིས་མ་ཉན་ཟེར་སླབ་སྦེ་ཡར་སོ་ནུག། མཚོ་སྨནམ་འདི་བྱོན་ཚར་བའི་ཤུལ་ལས་ཨང་རྒས་འདི་མཆོད་གཤམ་ནང་ལུ་སོང་སྦེ་ལྟཝ་ད་གཡུ་དཀརཔོ་ཅིག་བཞག་ནུག་ཟེར་ཨིན་མས། ཨང་རྒས་དེ་གིས་གཡུ་དེ་ཡང་མཚོ་སྨནམ་གིས་མོ་ལུ་གསོལ་རས་སྦེ་གནང་ཡོདཔ་ཨིནམ་ཧ་གོ་ཞིན་ན་ དེ་ལས་ཚུར་ཨང་རྒས་ཀྱི་རྒྱུ་ནོར་ཚུ་ཡང་ལེ་ཤ་འཕེལ་འགྱོ་ཡོདཔ་ཨིན་་རུང་ ཤུལ་ལས་མཚོ་སྨནམ་གི་བཞག་མི་གཡུ་དཀརཔོ་དེ་ཡང་བྱང་སྟེ་ ཨང་རྒས་ཀྱི་ནོར་ཚུ་ཡང་མར་འགྲོས་ཀྱིས་སྦེ་ཉམས་སོང་བའི་ལོ་རྒྱུས་འདུག། ས་གནས་ཀྱི་ངག་ཐོག་གི་ལོ་རྒྱུས་ལས་ལྟར་དུ་འབད་བ་ཅིན་ མཚོ་སྨནམ་གིས་ལང་སྦི་དང་འཛོལ་བ་ཁ་གཉིས་མོ་གིས་ཐོབ་དབང་བཟུང་སྟེ་ས་ཆ་ཨེ་ཀར་ ༡༣ འབད་མི་ནང་ལུ་མཚོ་ཆགས་ཏེ་བདག་དབང་འབད་ཡོདཔ་ཨིན་མས། ས་གནས་དེ་ཁར་ས་གནས་ཀྱི་མི་ཚུ་གིས་སྣང་དག་བསྐཡེད་མ་བཏུབ་པར་ རོ་ཁྱི་དང་རྟ་ཤི་ཤིཝ་གི་རོ་ཚུ་ཨ་རྟག་ར་བཀོ་བཏང་ནི་དེ་གིས་ མཚོ་འདི་ས་གནས་ཀྱི་གཡུས་ཚན་ལས་ཀི་ལོ་མི་ཊར་ ༥ དེ་ཅིག་གི་ས་ཁར་ཡོད་མི་བར་སྤང་ཟེར་ས་ལུ་སྤོ་བཤུད་འབད་དེ་ཨ་རིང་གི་འོག་ལུ་ཆགས་སྡོད་ནུག། ས་གནས་དེ་ཁར་ཡང་མི་ཕར་ཚུར་འགྲོ་འགྲུལ་འབད་མི་ཚུ་གིས་བར་ཆད་དང་བཙོག་པ་ཞུགས་ཏེ་ དེ་ལས་མཚོ་སྨནམ་དེ་གིས་མཚོ་འདི་དོ་རུང་ ས་ཆ་ཨེ་ཀར་ ༤.༤ ནགས་ཚལ་སྟུག་པག་པ་འབད་མི་ཁེངས་བུ་ལི་ལུ་སྤོ་བཤུད་འབད་ཡོདཔ་ཨིན་མས། འ་ནཱི་ད་ལྟོ་མཚོ་ཆགས་ཏེ་ཡོད་པའི་ས་ཆ་འདི་མཚོ་སྨནམ་གི་གཏན་འཇགས་ཀྱི་ཕོ་བྲང་ཅིག་ལུ་གྱུར་ཡོདཔ་ཨིན་མས།
མཚོ་སྨནམ་གི་རྒྱབ་ཁར་མཚོ་སྨནམ་གི་སྒོ་རཔ་ཟེར་མི་ཅིག་ཡོདཔ་ཨིན་མས། དེ་ཡང་ཁེངས་བུ་ལི་མཚོ་མཇལ་བར་འོང་མི་ཚུ་གིས་དང་པ་ར་ སྒོ་རཔ་འདི་མཇལ་དགོཔ་ཨིན་མས། དེ་ཡང་སྒོ་རཔ་གིས་མི་ཚུ་མཚོ་སྨནམ་མཇལ་བར་བཙོག་སྒྲིབ་མེད་ཚུ་རྐྱངམ་གཅིག་གཏང་སྟེ་ བཙོག་སྒྲིབ་ཡོད་མི་ཚུ་ལུ་སྒོ་རཔ་གིས་སྐད་རྐྱབ་སྟེ་བཏང་མི་བཏུབ་ཟེར་བཤདཔ་ཨིན་མས། མཚོ་དེ་གི་མཐའ་འཁོར་དང་སྦིར་སྤང་དེ་ལས་ས་གནས་དེའི་ཕྱོགས་བཞི་ལུ་ མཚོ་ཆུང་བརྒྱ་དང་ལྔ་ཡོད་མི་ཚུ་ག་ར་མཚོ་སྨནམ་གི་འཁོར་ཨིན་ཟེར་ཡིད་ཆེས་བསྐྱེདཔ་ཨིན་མས། དེ་ཁར་ཡོད་པའི་རྡོ་ཕུག་གུར་ལྷཁང་། ཚོང་པ། རོ་ཁྱི། སྦུལ། བྱ་པོད། ལག་ཐགས་དང་རྟ་ཚུ་ཐོན་ཡོད་མི་ཚུ་ མཚོ་སྨནམ་གི་ཨིན་ཟེར་བཤདཔ་ཨིན་མས། དེ་ནང་ལས་ཡང་ཡ་མཚན་ཆེ་ཏོག་ཏོ་འདི་བྱ་དཀརཔོ་ཕིག་སངས་མ་ཟེར་ ༡༠༨ ཡོད་མི་དེ་གིས་མཚོ་གུར་ཆགས་ཏེ་ཡོད་མི་འདབ་མ་ཚུ་དྲོ་པ་རེ་ཆད་མེད་པར་འཕྱག་བདའ་རྐྱབ་སྟེ་ ཧིང་སངས་ས་སྦེ་བཟོ་བཞག་མི་འདི་ཨིན་མས། དེ་ཡང་དུས་རབས་ ༡༢ པ་ནང་ལུ་གཏེར་བཏོན་རྡོ་རྗེ་གླིང་པ་དང་དུས་རབས་ ༡༥ པ་ནང་ལུ་གཏེར་བཏོན་པདྨ་གླིང་པ་གིས་ཡང་ས་གནས་དེ་ཁར་ཞབས་བཅགས་གནང་སྟེ་ མཚོ་སྨནམ་འདི་བྱིན་གྱིས་བརླབས་ཡོདཔ་ཨིན་མས། དོ་རུང་དེ་གི་ཤུལ་ལས་སྤོ་ལོ་མཁན་རིན་པོ་ཆེ། བླམ་རྒྱལ་བ་ཉི་མ། སྐྱབས་རྗེ་སྤྲུལ་སྐུ་འཇིགས་མེད་ཆོས་གྲགས། སྐྱབས་རྗེ་ནམ་སྙིང་རིན་པོ་ཆེ། གངས་སྟེང་སྤྲུལ་སྐུ་རིན་པོ་ཆེ། པད་ཚལ་གླིང་སྤྲུལ་སྐུ་རིན་པོ་ཆེ། སྐྱབས་རྗེ་ཐུགས་སྲས་རིན་པོ་ཆེ་དང་ཀ་ཐོག་སྲིད་ཐུབ་རིན་པོ་ཆེ་ཚུ་གིས་ཡང་ཞབས་བཅགས་ཏེ་བྱིན་གྱིས་བརླབས་གནང་ཡོདཔ་ཨིན་མས།
དེ་ལས་སྤྱི་ལོ་ ༢༠༡༤ ལུ་མི་དབང་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་གིས་ཡང་ཞབས་བཅགས་ཏེ་ བར་ལྷ་ཁང་ལུ་སྨན་མོ་ཀུན་ཏུ་བཟང་མོ་དང་རོང་ལཱ་ལྷ་བཙན་དཀར་པོ་གི་སྐུ་འདྲ་ཚུ་ཡང་གནང་ཡོདཔ་མ་ཚད་ ས་གནས་ཀྱི་མི་སེར་ཚུ་ལུ་མཚོ་དེ་གི་སྦོ་ལོགས་ཁར་ཀླུ་ཁང་གཅིག་ཡང་རྐྱབ་དགོ་པའི་བཀའ་རྒྱ་གནང་སྟེ་ ཀླུ་ཁང་ནང་ལུ་བཙུགས་ནིའི་རྡོ་ནག་གུར་མཚོ་སྨན་གསེར་བྲིས་མ་ཅིག་ཡང་གནང་ནུག། སྤྱི་ལོ་ ༢༠༡༦ ལུ་མཚོ་སྨན་སྲུང་སྐྱོབ་འབད་ནིའི་དོན་ལུ་ འབྲུག་བློ་གཏད་མ་དངུལ་གྱིས་མཚོ་སྐོར་ར་རྐྱབ་སྟེ་རྭ་རྐྱབ་ནུག། ད་རེས་ནངས་པ་ས་གནས་ནང་ལུ་བདག་འཛིན་པ་གཅིག་ཡང་བཙུགས་ཏེ་ ཁོ་གིས་ས་གནས་ཀྱི་མི་ཚུ་མཚོ་མཇལ་བ་འོང་མི་ཚུ་ལས་འཛུལ་ཞུགས་ཀྱི་འཐུས་དངུལ་ཀྲམ་ ༣༠ དང་ཕྱི་རྒྱལ་གྱི་མི་ཚུ་ལས་དངུལ་ཀྲམ་ ༡༠༠ བསྡུ་མི་དེ་གིས་ལོ་རེ་ནང་ལུ་མཚོ་སྨནམ་ལུ་ལེགས་འབུལ་ཚར་གཉིས་ཕུལ་མི་གི་ཟད་འགྲོ་སྦེ་ལག་ལེན་འཐབ་དོ་ཨིན་མས།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
རྒྱབ་རྟེན་དཔེ་ཐོ།
ཞུན་དག༡. འབྲུག་གི་གནས། གཞལམ་སྒང་གི་བྱིན་ཅན་བུ་ལི་གནས། གནམ་ལོ་མེད། སྤྱི་ལོ་ ༢༠༢༡། ཕེསི་བྷུག།